Results 1 to 3 of 3
  1. #1
    Runner Up - Admins Awards www.desirulez.net
    Join Date
    Dec 2009
    Posts
    24,894

    T

    Default 35-Soorah-e-Fatir-Aayat-45

    Follow us on Social Media







    Shroo Allah Ke Naam Se Joh Bara Meherbaan Aur Nihayat Rehem Farmane Wala Hai.
    1
    Sab Taareef Khuda Hi Ko Sazawar Hai Joh Aasmaanoun Aur Zameen Ka Paida Karne Wala Aur Farishtoun Ko Qaasid Banane Wala Hai Jin Ke Do Do Aur Teen Teen Aur Chaar Chaar Par Hain.Wo Apni Makhlooqaat Main Joh Chahta Hai Barhata Hai.Be Shak Khuda Har Cheez Par Qaadir Hai.
    2
    Khuda Joh Apni Rehmat Ka Darwaza Khol De Toh Koi Us Ko Band Karne Wala Nahi.Aur Joh Band Kar De Toh Us Ke Baad Koi Us Ko Kholne Wala Nahi.Aur Wo Gaalib Hikmat Wala Hai.
    3
    Lougo Khuda Ke Joh Tum Par Ehsaanaat Hain Un Ko Yaad Karo.Kia Khuda Ke Siwa Koi Aur Khaliq Aur Raaziq Hai Joh Tum Ko Aasmaan Aur Zameen Se Rizqq De.Is Ke Siwa Koi Maabood Nahi Pas Tum Kahan Behke Phirte Ho?
    4
    Aur Ae Peigambar S.A.W. Agar Ye Loug Tum Ko Jhutlaayen Toh Tum Se Pehle Bhi Paigambar Jhutlaye Gaye Hain.Aur Sab Kaam Khuda Hi Ki Taraf Loutaye Jaayenge.
    5
    Lougo Khuda Ka Waada Sacha Hai.Toh Tum Ko Dunia Ki Zindagi Dhoke Main Na Daal Se Aur Na Shaitaan Faraib Dene Wala Tumhain Faraib De.
    6
    Shaitaan Tumhara Dushman Hai Tum Bhi Usse Dushman Samjho.Wo Apne Pairwi Karne Waloun Ke Guroh Ko Bulata Hai Taa-Ake Wo Dozakh Waloun Main Houn.
    7
    Jinhoun Ne Kufur Kia Un Ke Liye Sakht Azaab Hai.Aur Joh Eeman Laaye Aur Amal-E-Naik Karte Rahe Un Ke Liye Bakhshish Aur Bara Sawab Hai.
    8
    Bhala Jis Shakhs Ko Is Ke Aamaal-E-Bad Aaraasta Kar Ke Dikhaye Jaaye Aur Wo Unko Umda Samajhne Lage Toh Kia Wo Naiko Kaar Aadmi Jaisa Ho Sakta Hai.Be Shak Khuda Jis Ko Chahta Hai Gumraah Karta Hai Aur Jis Ko Chahta Hai Hidayat Deta Hai.Toh In Lougon Par Afsos Kar Ke Tumhara Dam Na Nikal Jaye.Ye Joh Kuch Karte Hain Khuda Us Se Waqif Hai.
    9
    Aur Khuda Hi Toh Hai Joh Hawaayen Chalata Hai Aur Wo Baadal Ko Ubhaarti Hain Phir Ham Is Ko Aik Be Jaan Sheher Ki Taraf Chalate Hain.Phir Is Se Zameen Ke Marne Ke Baad Zinda Kar Dete Hain.Issi Tarha Murdoun Ko Jee Uthna Hoga.
    10
    Joh Shakhs Izzat Ka Talabgaar Hai Toh Izzt Toh Sab Khuda Hi Ki Hai.Ussi Ki Taraf Paakeeza Kalmaat Charhte Hain Aur Naik Amal Us Ko Buland Karte Hain.Aur Joh Loug Bure Bure Makkar Karte Hain Un Ke Liye Sakht Azaab Hai.Aur In Ka Makkar Nabood Ho Jaye Ga.
    11
    Aur Khuda Hi Ne Tum Ko Matti Se Paida Kia Phir Nutfe Se Phir Tum Ko Jora Jora Bana Dia.Aur Koi Aurat Na Haamla Hoti Hai Aur Na Janti Hai Magar Us Ke Ilm Se.Aur Na Kisi Bari Umar Wale Ko Umar Ziada Di Jati Hai Aur Na Us Ki Umar Kam Ki Jati Hai Magar Sab Kuch Kitaab Main Likha Hua Hai.BeShak Ye Khuda Ko Aasaan Hai.
    12
    Aur Dono Darya Mill Kar Yaksan Nahi HoJate.Ye Toh Meetha Hai Piyaas Bujhane Wala.Jis Ka Paani Khushgawaar Hai Aur Ye Khari Hai Karwa.Aur Sab Se Tum Taaza Gosht Khate Ho Aur Zewar Nikaalte Ho Jisse Pehente Ho.Aur Tum Darya Main Kashtiyoun Ko Daikhte Ho Ke Paani Ko Phaarti Chali Aati Hain Taa-Ake Tum Is Ke Fazal Se Moaash Talash Karo Aur Taa-Ake Shukar Karo.
    13
    Wo Hi Raat Ko Din Main Daakhil Karta Aur Wo Hi Din Ko Raat Main Daakhil Karta Hai Aur Ussi Ne Sooraj Aur Chaand Ko Kaam Main Laga Dia Hai.Har Aik Aik Waqt-E-Muqarrar Tak Chal Raha Hai .Ye Hi Khuda Tumhara Parwardigar Hai Us Ki Baadshahi Hai.Aur Jin Lougoun Ko Tum Us Ke Siwa Pukaarte Ho Wo Khajoor Ki Guthli Ke Chilke Ke Barabar Bhi Toh Kisi Cheez Ke Malik Nahi.
    14
    Agar Tum Un Ko Pukaro Toh Wo Tumhari Pukaar Na Sunain Aur Agar Sunn Bhi Lain Toh Tumhari Baat Ko Qabool Na Kar Sakain.Aur Qiamat Ke Roz Tumhare Shirk Se Inkar Kar Dainge.Aur Khudaaye Ba Khabar Ki Tarha Tumko Koi Khabar Nahi De Ga.
    15
    Lougo Tum Sab Khuda Ke Mohtaaj Ho Aur Khuda Be Parwa Sazawar Hamd-O-Sana Hai.
    16
    Agar Chaahe Toh Tumko Nabood Kar De Aur Nai Makhlooqaat La Abaad Kare.
    17
    Aur Ye Khuda Ko Kuch Mushkil Nahi.
    18
    Aur Koi Uthaane Wala Doosre Ka Bojh Na Uthaaye Ga.Aur Koi Bojh Main Daba Hua Apna Bojh Bataane Ko Kisi Ko Bulaye Toh Koi Us Main Se Kuch Na Uthaaye Ga Agarcha Qarabat Daar Hi Ho.Ae Paigambar S.A.W. Tum Un Hi Lougon Ko Naseehat Kar Satke Ho Joh Bin Daikhe Apne Parwrdigar Se Darte Aur Namaaz Biltizaam Parhte Hain.Aur Joh Shakhs Paak Hota Hai Wo Apne Hi Liye Paak Hota Hai.Aur Sab Ko Khuda Hi Ki Taraf Lout Kar Jaana Hai.
    19
    Aur Andha Aur Aankh Walaa Barabar Nahi.
    20
    Aur Na Andhaira Aur Roshni.
    21
    Aur Na Saaya Aur Na Dhoop.
    22
    Aur Na Zinde Aur Murde Barabar Ho Sakte Hain.Khuda Jis Ko Chahta Hai Suna Deta Hai.Aur Tum Un Ko Joh Qabroun Main Madfoon Hain Suna Nahi Sakte.
    23
    Tum Toh Sirf Hidayat Karne Wale Ho.
    24
    Ham Ne Tum Ko Haq Ke Sath Khushkhabri Sunane Wala Aur Darane Wala Bhaija Hai.Aur Koi Ummat Nahi Magar Us Main Hidayat Karne Wala Guzar Chukka Hai.
    25
    Aur Agar Ye Tumahri Takzeeb Karain Toh Joh Loug Un Se Pehle The Wo Bhi Takzeeb Kar Chuke Hain Un Ke Pas Un Ke Paigamabar Nishaniyan Aur Saheefe Aur Roshan Kitaabain Le Le Kar Aate Rahe.
    26
    Phir Main Ne Kaafiroun Ko Pakar Liya So Daikh Lo Ke Mera Azaab Kaisa Hua.
    27
    Kia Tum Ne Nahi Daikha Ke Khuda Ne Aasmaan Se Meenh Barsaya .Toh Hamne Us Se Tarha Tarha Ke Rangoun Ke Maiwe Paida Kiye .Aur Paharoun Main Safaid Aur Surkh Rangoun Ke Qataat Hain Aur Baaz Kaale Siyaah.
    28
    Insaanoun Aur Jaanwaroun Aur Chaarpaaiyoun Ke Bhi Kai Tarha Ke Rang Hain.Khuda Se Toh Us Ke Bandoun Main Se Wo Hi Darte Hain Joh Sahib-E-Ilm Hain.Be Shak Khuda Gaalib Aur Bakhashne Wala Hai.
    29
    Joh Loug Khuda Ki Kitaab Parhte Aur Namaaz Ki Paa Bandi Karte Hain Aur Joh Kuch Ham Ne Un Ko Dia Hai Us Main Se Posheeda Aur Zahir Kharch Karte Hain Wo Is Tijarat Ke Faaide Ke Umeedwaar Hain Joh Kabhi Tabah Nahi Hogi.
    30
    Kion Ke Khuda Un Ko Poora Poora Badla De Ga Aur Apne Fazal Se Kuch Ziada Bhi De Ga.Wo Toh Bakhashne Wala Aur Qadardaan Hai
    31
    Aur Ye Kitaab Joh Hamne Tumhari Taraf Bhaiji Hai Bar Haq Hai.Aur Un Kitaboun Ki Tasdeeq Karti Hai Joh Us Se Pehle Ki Hain.Be Shak Khuda Apne Bandoun Se Khabardaar Aur Un Ko Daikhne Wala Hai.
    32
    Phir Ham Ne Un Lougon Ko Kitab Ka Waaris Thehraya Jin Ko Apne Bandoun Main Se Burguzeeda Kia.Toh Kuch Toh In Main Se Apne Aap Par Zulm Karte Hain Aur Kuch Miyana Rou Hain.Aur Kuch Khuda Ke Hukum Se Naikiyoun Main Aage Nikal Jaane Wale Hain.Ye Hi Bara Fazal Hai.
    33
    In Lougon Ke Liye Behshat Jawedaani Hai Jin Main Wo Daakhil Houge. Wahan Un Ko Sone(Gold) Ke Kangan Aur Moti Pehnaye Jaayen Ge.Aur Un Ki Poshaak Reshmi Hogi.
    34
    Wo Kahain Ge Ke Khuda Ka Shukar Hai Jis Ne Ham Se Gham Door Kia.Be Shak Hamara Parwardigar Bakhshne Wala Aur Qadardaan Hai.
    35
    Jis Ne Hamko Apne Fazal Se Hamesha Ke Rehne Ke Ghar Main Utaara.Yayan Na Toh Ham Ko Ranj Pohonche Ga Aur Na Hamain Thakaan Hi Hogi.
    36
    Aur Jin Lougon Ne Kufur Kia Un Ke Liye Dozakh Ki Aag Hai.Na Unhain Mout Aaye Gi Ke Mar Jaayen Aur Na Us Ka Azaab Hi Un Se Halka Kia Jaye Ga.Ham Har Aik Na Shukre Ko Aisa Hi Badla Dia Karte Hain.
    37
    Wo Is Main Chillayen Ge Ke Ae Parwardigar Ham Ko Nikaal Le Ab Ham Naik Amal Kia Kariange.Na Wo Joh Pehle Karte The.Kia Ham Ne Tumko Itni Umar Nahi Di Thi Ke Us Main Joh Sochna Chahta Soch Leta Aur Tumahre Paas Darane Wala Bhi Aaya.Toh Ab Maze Chakho .Zaalimoun Ka Koi Madadgaar Nahi.
    38
    Be Shak Khuda Hi Aasmaanoun Aur Zameen Ki Posheeda Baatoun Ka Jaan-Ne Wala Hai.Wo Toh Dil Ke Bhaidoun Tak Se Waqif Hai.
    39
    Wo Hi Toh Hai Js Ne Tumko Zameen Main Pehloun Ka Janasheen Banaya .Toh Jis Ne Kufur Kia Us Ke Kufur Ka Zarrar Ussi Ko Hai.Aur Kaafiroun Ke Haq Main Un Ke Kufur Se Parwardigar Ke Haan Na Khushi Hi Barhti Hai Aur Kaafiroun Ko Un Ka Kufur Nuqsaan Hi Ziada Karta Hai.
    40
    Bhala Tum Ne Apne Shareekoun Ko Daikha Jin Ko Tum Khuda Ke Siwa Pukaarte Ho.Mujhe Dikhao Ke Unhoun Ne Zameen Se Koun Si Cheez Paida Ki Hai Ya Bataow Ke Aasmaanoun Main Un Ki Shirkat Hai. Ya Ham Ne Un Ko Kitaab Di Hai Toh Wo Us Ki Sanad Rakhte Hain Un Main Se Koi Baat Bhi Nahi Balke Zaalim Joh Aik Doosre Ko Waada Dete Hain Mehez Faraib Hai.
    41
    Khuda Hi Aasmaanoun Aur Zameen Ko Thaame Rakhta Hai Ke Taal Na Jayen.Agar Wo Tall Jaye Toh Khuda Ke Siwa Koi Aisa Nahi Joh Un Ko Thaam Sake.Be Shak Wo Burdbaar Aur Bakhashne Wala Hai.
    42
    Ye Khuda Ki Sakht Sakht Qasmain Khaate Hain Ke Agar Un Ke Paas Koi Hidayat Karne Wala Aaya Toh Us Se Un Ko Nafrat Hi Barhi.
    43
    Yaani Unhoun Ne Mulk Main Garoor Karna Aur Buri Chaal Chalna Ikhtiyar Kia Aur Buri Chaal Ka Wabaal Us Ke Chalne Wale Hi Par PartaHai.YeAgle Lougon Ki Rawish Ke Siwa Aur Kisi Cheez Ke Muntazir Nahi.So Tum Khuda Ki Aadat Main Har Gizz Tabbaddul Na Paao Ge.Aur Khuda Ke Tareeqe Main Kabhi Tagaiyuur Na Daikho Ge.
    44
    Kia Unhoun Ne Zameen Main Sair Nahi Ki Taa-Ake Daikhte Ke Joh Loug Unse Pehle The Un Ka Anjaam Kia Hua Halanke Wo Un Se Quwwat Main Bohot Ziada The.Aur Khuda Aisa Nahi Ke Aasmaanoun Aur Zameen Main Koi Cheez Us Ko Aajiz Kar Sake.Wo Ilm Wala Aur Qudrat Wala Hai.
    45
    Aur Agar Khuda Lougon Ko Un Ke Aamal Ke Sabab Pakarne Lagta.Toh Roo-E-Zameen Par Aik Chalne Phirne Wale Ko Na Chorta.Lekin Wo Un Ko Aik Waqt-E-Muqarrar Tak Mohlat Diye Jata Hai.So Jab Un Ka Waqt Aa Jaye Ga Toh Us Ke Aamaal Ka Badla De Ga Khuda Toh Apne Bandoun Ko Daikh Raha Hai.


    Dua.
    Ya Allah Be Shak Tu Bohot Rehem Farmane Wala Hai Aur Is Dunia Main Hamain Mohlat Diye Jaa Raha Hai.Aur Ham Jitni Bhi Touba Karain Aur Jitni Bhi Apne Gunaahoun Ki Moaafi Maangain Wo Kam Hai Aur Agar Tu Chahe Toh Is Dunia Main Ham Main Se Koi Bhi Insane Sukhi Nahi Rahe.Par Ya Allah Tu Ne Ham Sab Ko Khuli Aish Main Daal Kar Hamare Liye Aazmaaish Rakhi Hui Hai Hamain Is Qabil Bana De Ke Ham Aazmaaish Main Poore Utar Sakain..Kahin Ham Apne Lougon Se Dil Main Keena Rakhte Hain Aur Kahin Ham Modern Waqt Ke Naam Pe Khud Ki Nature Hi Badle Ja Rahe Hain,Kahin Ham Status Ki Maar Kha Kar Apne Rehen Sehen Ke Tareeqoun Ko Badle Ja Rahe Hain Aur Kahin Ham La Parwahi Ka Shikaar Hain.Ya Allah Ye Waqt Ki Nazakat Hai Aur Badalte Zameene Ke Badalte Tour Tareeqoum Ka Asar Ke Ham Badle Ja Rahe Hain Aur Apni Asliyat Se Bohot Bohot Door Hote Ja Rahe Hain.Ya Allah Hamain Us Waqt Se Bachana Jab Koi Kisi Ka Nahi Hoga Aur Koi Kisi Ka Khayal Nahi Kare Ga.Ya Allah Hamain Shar Ke Waqt Se Mehfooz Rakhna Aameen..
    ...being a human...



  2. #2
    Retired Staff www.desirulez.net
    Join Date
    Oct 2009
    Location
    lahore .pakistan
    Posts
    1,381

    T

    Default

    nice post

  3. #3
    RIP-Mate, You ll be Remembered:) www.desirulez.netwww.desirulez.net
    Join Date
    Feb 2011
    Posts
    1,613

    T

    Default

    Jazak Allah..! Nice & Great Sharing ........

 

 

Posting Permissions

  • You may not post new threads
  • You may not post replies
  • You may not post attachments
  • You may not edit your posts
  •